O కంప్యూటర్ అక్కర్లేదు.. మొబైల్ చాలు O భారతీయ భాషల్లో న్యూస్, ఈ-బుక్స్, ఎగ్జామ్ ప్రెప్
O ఉచితం కొన్ని.. కొనుగోలుకు మరిన్ని O అందరినీ ఆకట్టుకుంటున్న 'డైలీహంట్' యాప్
మీరు వార్తలంటే చెవి కోసుకుంటారా? పుస్తకాలంటే పడిచస్తారా? మీ జేబులో మొబైల్ ఉందా? అయితే ఇక ఆలస్యమెందుకు? వెంటనే అందులో 'డైలీహంట్ '
యాప్ డౌన్ లోడ్ చేసుకోండి.. అక్షర ప్రపంచంలోకి అడుగిడండి. మీ భాషలోనే మీకు
నచ్చిన దినపత్రికలన్నిటినీ వరసబెట్టి చదివేయండి. మీకు నచ్చిన, మీరు
మెచ్చిన పుస్తకాలన్నీ ఓ పట్టు పట్టేయండి. వార, మాస పత్రికలు, పిల్లల
పుస్తకాలు, పెద్దల పుస్తకాలు, డిటెక్టివ్ లు మొదలుకొని సాంఘిక నవలల వరకు
ఒకటేమిటి.. బోలెడన్ని. మీరు ఇంట్లో ఉన్నా, ప్రయాణంలో ఉన్నా.. మీ అరచేతిలోనే
పుస్తక ప్రపంచం.. ఆపైన కావలసినంత కాలక్షేపం! ఉదయాన్నే
నిద్రలేచి..
అలా వాకింగ్ కి వెళ్ళి.. ఓ గంట తర్వాత ఇంటికి తిరిగొస్తూ పాలప్యాకేట్
లేదా న్యూస్ పేపర్ తెచ్చుకునే వాళ్ళని మనం చూస్తుంటాం. ఒకవేళ పుస్తకాల
పిచ్చి ఉంటే గనక, ఇంట్లో ఉన్న నవలలు, మ్యాగజైన్లను ఓ పట్టు పట్టేసి.. అవీ
చాలక, పక్కింటి నుంచో.. ఎదురింటి నుంచో, లేదంటే లెండింగ్ లైబ్రరీ నుంచో
పుస్తకాలు అరువు తెచ్చుకుని కాలక్షేపం చేసే వాళ్లు కూడా ఎందరో! ఇదంతా ఓల్డ్
ట్రెండ్. ఇంట్లో ఉన్నా, ప్రయాణంలో ఉన్నా, ఎక్కడున్నా సరే.. బోలెడు
పత్రికలు, పుస్తకాలు వచ్చి మీ ఒళ్ళో వాలిపోవడం ఇప్పుడు లేటెస్ట్ ట్రెండ్.
జస్ట్ మీ చేతిలో మొబైల్.. అందులో 'డైలీహంట్' యాప్ ఉంటే చాలు.. ! ఏమిటీ అప్లికేషన్?
బెంగళూరు కేంద్రంగా కార్యకలాపాలు సాగిస్తోన్న ' వెర్సె ఇన్నోవేషన్ ప్రయివేట్ లిమిటెడ్ ' వినూత్న ఆవిష్కరణే 'డైలీహంట్'
(గతంలో 'న్యూస్ హంట్' యాప్) మొబైల్ అప్లికేషన్. ఇదొక ఆన్ లైన్ న్యూస్ అండ్
ఈ-బుక్ స్టోర్. ఇప్పటివరకు 12 భాషల్లో అన్ని ప్రముఖ, ఓ మోస్తరు పేరున్న
దినపత్రికలు, లక్షా అరవై వేలకుపైగా ఈ-పుస్తకాలు, ఈ-పత్రికలు ఈ ఆన్ లైన్
బుక్ స్టోర్లో అందుబాటులో ఉన్నాయి. ఒక్క తెలుగు భాషకు సంబంధించే పది వేలకు
పైగా ఈ-పుస్తకాలు, మ్యాగజైన్లు దర్శనమిస్తున్నాయి. ఇప్పటివరకు 95 మిలియన్ల
మంది.. అంటే 9.5 కోట్ల మంది ఈ 'డైలీహంట్' అప్లికేషన్ను తమ మొబైల్ ఫోన్లలో
డౌన్ లోడ్ చేసుకుని వార్తా, పుస్తక దాహాన్నితీర్చుకున్నారు. ఈ 'డైలీహంట్'
అప్లికేషన్ జె2ఎంఇ, సింబయాన్, బ్లాక్ బెర్రీ, ఆండ్రాయిడ్, ఐఒఎస్ తదితర
ఆపరేటింగ్ సిస్టంలతో కూడిన అన్ని మొబైల్ ఫోన్లలో పనిచేస్తుంది. కేటగిరీల వారీగా...
ఈ-పుస్తకాలన్నీ
కూడా కేటగిరీల వారీగా మీకు దర్శనమిస్తాయి. కల్పన, ఉద్రేకం-ఉత్కంఠ, గూఢచారి
కథలు, చిన్న కథలు, పిల్లల పుస్తకాలు, మతం-ఆధ్యాత్మికం, హాస్యం, ప్రేమ,
జీవిత చరిత్రలు-జ్ఞాపకాలు, సాహిత్యం, సంగీతం-సినిమాలు-వినోదం,
నాటకాలు-నాటికలు, చరిత్ర-రాజకీయాలు, కుటుంబం-సంబంధాలు, నవలలు, గ్రాఫిక్‌
నవలలు, జ్యోతిష్యం, పెద్దలకు మాత్రమే తదితర విభాగాల లో పెద్ద పెద్ద రచయితలు
మొదలుకొని చిన్న రచయితల వరకు రాసిన పుస్తకాలు కొలువుదీరాయి. కేవలం
పుస్తకాలే కాకుండా సరస సలిల, గృహశోభ, మాలిక పత్రిక, గో తెలుగు, కరంట్‌
అఫైర్స్‌, చంపక్‌, రామకృష్ణ ప్రభ, మన ఆరోగ్యం, వండర్-వండర్, ఫిలింసిటీ,
బాలల బొమ్మరిల్లు, దైవశక్తి, కంప్యూటర్స్ ఫర్ యు, సినీస్కోప్, సినీ నెంబర్
వన్, సినీ సందడి, ఆహారం-ఆరోగ్యం, జ్యోతిషవాణి, హర్రర్ వంటి పత్రికలు కూడా
'డైలీహంట్' ఆన్‌లైన్‌ బుక్‌స్టోర్‌లో మీకు లభిస్తాయి. ఉచితం కొన్ని.. కొనుగోలుకు మరిన్ని
'డైలీహంట్'
ఆన్ లైన్ ఈ-బుక్ స్టోర్లో కొన్ని ఈ-పుస్తకాలు, ఈ-మ్యాగజైన్లు ఉచితంగా కూడా
లభిస్తున్నాయి. మరికొన్నితక్కువ ధరకే అందుబాటులో ఉన్నాయి. జస్ట్ ఒక్క
రూపాయికే మీకు నచ్చిన మ్యాగజైను లేదా పుస్తకం లభిస్తోందంటే
కొనుక్కోనివాళ్లు ఉంటారా? పైగా ప్రతిరోజూ బోలెడన్ని ఆఫర్లు! బయట పుస్తకాల
మార్కెట్లో రూ.60-90కి లభించే పుస్తకం 'డైలీహంట్' ఆన్ లైన్ బుక్ స్టోర్లో
కేవలం రూ.6కే లభిస్తుందంటే ఆశ్చర్యం కాక మరేమిటి? పైగా మ్యాగజైను లేదా
పుస్తకం ఓసారి డౌన్ లోడ్ చేసుకుంటే అది మీ మొబైల్ ఫోన్లలో ఎప్పటికీ భద్రంగా
ఉంటుంది. ఎప్పుడు కావాలనుకుంటే అప్పుడు.. ఎక్కడ కావాలనుకుంటే అక్కడ మీరు
యాప్ లోని 'మై బుక్స్' విభాగంలోకి వెళ్లి చదువుకోవచ్చు.
చెల్లింపు అతిసులభం!
'డైలీహంట్'
ఈ-బుక్ స్టోర్లో మీకు నచ్చిన పుస్తకాలు కొనుక్కోవడం ఎంతో సులభం.
దీనికోసం మీరు క్రెడిట్‌ లేదా డెబిట్‌ కార్డు వాడనక్కర్లేదు. ప్రీపెయిడ్‌
ఖాతాదారులైనా, పోస్ట్‌పెయిడ్‌ ఖాతాదారులైనా కేవలం మీ మొబైల్ బ్యాలెన్స్‌
ద్వారా చెల్లింపు జరపవచ్చు. మీ కొనుగోలు, చెల్లింపులను అత్యంత సులభతరం
చేయడం కోసం 'డైలీహంట్' తన సొంత పేమెంట్‌ గేట్‌వే 'ఐ-పే'తో పాటుగా 'జస్‌
పే', 'పేపాల్‌', 'సిట్రస్‌ పే' వంటి పేమెంట్‌ గేట్‌వేలను కూడా అందుబాటులో
ఉంచింది. కొనుగోలు ఇలా...
'డైలీహంట్'
ఆన్‌లైన్‌ ఈ-బుక్ స్టోర్లో మీరు ఇష్టపడిన లేదా మీకు ఆసక్తి ఉన్న
ఈ-పుస్తకం, లేదా ఈ-పత్రికను కొనుగోలు చేయడం చాలా తేలిక. ఆ పుస్తకం లేదా
పత్రికను మీ చూపుడు వేలితో తాకి చూడండి. వెంటనే ఆ పుస్తకం లేదా పత్రిక
పేరు, రచయిత లేదా రచయిత్రి పేరు, దాని అసలు ధర, తగ్గింపు ధర తదితర వివరాలు
మీ మొబైల్ తెరపై ప్రత్యక్షమవుతాయి. ఆ పుస్తకం గురించిన కొద్దిపాటి వర్ణన
కూడా మీకు బుక్ డీటెయిల్స్ లో కనిపిస్తుంది. పుస్తకం లేదా పత్రికను
కొనుక్కోవాలని నిశ్చయించుకుంటే ధరతో కూడిన లేత ఆకుపచ్చ రంగు ట్యాబ్‌పై
చూపుడు వేతితో తాకండి. దీంతో మీరు నేరుగా పేమెంట్‌ గేట్‌వే పేజీలోకి
వెళ్లిపోతారు. అక్కడ మొబైల్ పేమెంట్‌ ఆప్షన్‌ కనిపిస్తుంది. కింద మీ
మొబైల్ నెట్‌వర్క్‌ గుర్తు కూడా మీరు గమనించవచ్చు. మీ కొనుగోలుకు
సంబంధించి రసీదు పొందదలచుకుంటే నిర్ణీత గడిలో మీ ఈ-మెయిల్ ఐడిని టైప్‌
చేయండి. లేదంటే నేరుగా పే సెక్యూర్‌లీ అనే అక్షరాలతో కూడిన లేత ఆకుపచ్చ
రంగు ట్యాబ్‌పై క్లిక్ చేయండి. ఆ తరువాత మీ మొబైల్‌ఫోన్‌కు వన్ టైం
పాస్‌వర్డ్‌ (ఒటిపి) పంపబడుతుంది. దాన్ని నిర్ణీత గడిలో ఎంటర్‌ చేయడం
ద్వారా మీ సదరు ఈ-పుస్తకం, లేదా ఈ-పత్రిక 'డైలీహంట్' అప్లికేషన్‌లోని 'నా
పుస్తకాలు' విభాగంలోకి డౌన్‌లోడ్‌ చేసుకోగలుగుతారు. మీరు ప్రీపెయిడ్‌
మొబైల్ వినియోగదారులైతే పుస్తకం ధర మీ మొబైల్ బ్యాలెన్స్‌ నుంచి
తగ్గింపబడుతుంది. ఒకవేళ పోస్ట్‌పెయిడ్‌ వినియోగదారులైతే ఆ ధర మీ నెలసరి
బిల్లులో జమ అవుతుంది. ఇదంతా క్షణాల వ్యవధిలోనే జరిగిపోతుంది కాబట్టి
మీకేమాత్రం అసౌకర్యంగా అనిపించదు.
ఇన్‌స్టాలేషన్‌ ఇలా...
'డైలీహంట్' మొబైల్ అప్లికేషన్ను మీ మొబైల్ ఫోన్‌లో ఇన్‌స్టాల్‌
చేసుకోవడం కూడా చాలా తేలిక. ఒకవేళ మీరు ఆండ్రాయిడ్ మొబైల్
వాడుతున్నట్లయితే నేరుగా గూగుల్ ప్లే స్టోర్‌లోకి వెళ్లండి. అక్కడ
కనిపించే సెర్చ్‌ ఆప్షన్‌లో డైలీహంట్ అని ఆంగ్లంలో టైప్‌ చేయండి. వెంటనే మీ
మొబైల్ తెరపై 'డైలీహంట్' అప్లికేషన్ కనిపిస్తుంది. దానిపై మీ చూపుడు
వేలితో ఒక్కసారి తాకండి. అంతే.. క్షణాల వ్యవధిలో మీ మొబైల్ ఫోన్‌లోని
అప్లికేషన్ల జాబితాలో 'డైలీహంట్' అప్లికేషన్ ఇన్‌స్టాల్‌ అయిపోతుంది.
ఇతరత్రా అపరేటింగ్‌ సిస్టంలతో పనిచేసే మొబైల్ ఫోన్లలోనూ ఇదే మాదిరిగా
అప్లికేషన్ను డౌన్‌లోడ్‌ చేసుకోవచ్చు. మీ ప్రాధాన్య భాషను ఎంచుకునేటప్పుడు
మాత్రం ఒకింత జాగ్రత్త వహించండి. ఎందుకంటే ఆ తరవాత ఈ అప్లికేషన్ అంతా
మీరు ఎంచుకున్న భాషలోనే మీకు కనిపిస్తుంది కాబట్టి. వీలయినంత వరకు మీ
మాతృభాషను ఎంచుకోవడమే ఉత్తమం.
పోటీ పరీక్షల కోసం..
ఈ
'డైలీహంట్' మొబైల్ యాప్ లోని మరో అత్యుత్తమ ఫీచర్ 'ఎగ్జామ్ ప్రెప్'. ఇది
నిరుద్యోగ అభ్యర్థులకు తాము కోరుకుంటున్నప్రభుత్వ ఉద్యోగాన్ని సాధించడంలో
ఎంతగానో తోడ్పడుతుంది. ప్రభుత్వ ఉద్యోగాల కోసం అటు కేంద్ర ప్రభుత్వం, ఇటు
వివిధ రాష్ట్ర ప్రభుత్వాలు నిర్వహించే వివిధ పోటీ పరీక్షల కోసం సన్నద్ధం
అయ్యేందుకు అవసరమయ్యే అన్ని రకాల పుస్తకాలు, ఇతర స్టడీ మెటీరియల్ తోపాటు
ఆయా పోటీ పరీక్షలకు సంబంధించిన మాక్ (నమూనా) పరీక్షలు కూడా ఈ 'ఎగ్జామ్
ప్రెప్' విభాగంలో అందుబాటులో ఉంటాయి. దీనికి సంబంధించి ఇటీవలే ప్రత్యేకంగా
మరో సరికొత్త యాప్ ను దైలీహంట్ ఆవిష్కరించింది. ఈ యాప్ కూడా ప్రస్తుతం
గూగుల్ ప్లే స్టోర్ లో అందరికీ అందుబాటులో ఉంది.
అరె! ఇదేదో బాగుందే.. అనుకుంటున్నారా? మరి ఆలస్యమెందుకు.. ఇప్పుడే మీ మొబైల్ లో 'డైలీహంట్'
యాప్ డౌన్ లోడ్ చేసుకోండి. 'అరచేతిలో.. పుస్తక ప్రపంచం' అనుభవాన్ని
ఆస్వాదించండి! మీకు నచ్చిన పుస్తకాలన్నీ ఓ పట్టు పట్టేయండి.. పనిలో పనిగా
మీరు నిరుద్యోగులయితే 'ఎగ్జామ్ ప్రెప్' సాయంతో మంచి ప్రభుత్వ ఉద్యోగాన్నీ
కొట్టేయండి!
ఇంటర్నెట్
బ్రౌజింగ్ చేస్తున్నప్పుడు ఒక్కోసారి కొన్ని వెబ్ సైట్లు మన పేరు,
చిరునామా, ఈ-మెయిల్ ఐడి అడుగుతుంటాయి. పేరు, చిరునామా పర్వాలేదు కానీ..
ముక్కూ మొహం తెలియని వెబ్ సైట్లకు మన ఈ-మెయిల్ ఐడి ఇవ్వడం సురక్షితమేనా?
ఇలాంటి అనుమానం మీకు కలిగినప్పుడు డిస్పోజబుల్ (యూజ్ అండ్ త్రో) ఈ-మెయిల్
ఐడితో మీ పని ముగించవచ్చు. అరె.. డిస్పోజబుల్ ఈ-మెయిల్ ఐడి కూడా ఉంటుందా?
అని ఆశ్చర్యపోతున్నారా? అయితే చదవండి మరి!
కొన్ని కోట్ల వెబ్
సైట్లు, లక్షల బ్లాగ్ లతో ఇప్పుడు ఇంటర్నెట్ ఒక మహాసముద్రం అయిపోయింది. ఆన్
లైన్లోకి అడుగుపెట్టడమంటే.. ఈత రాని వ్యక్తి ఓ చిన్న పడవలో సముద్రంలోకి
బయలుదేరడమే. వెబ్ బ్రౌజింగ్ సమయంలో కొన్నిసార్లు ఆన్ లైన్ అప్లికేషన్లు
భర్తీ చేయాల్సిన అవసరం ఏర్పడుతుంది. మన పేరు, చిరునామా, ఉపయోగంలో ఉన్న
ఈ-మెయిల్ ఐడి సహా బోలెడు వివరాలు సమర్పించుకోవాల్సి ఉంటుంది.
పేరు, చిరునామా ఇవ్వడం వల్ల పెద్ద సమస్యలు తలెత్తవుకానీ, ఎటొచ్చీ
ఈ-మెయిల్ ఐడి ఇవ్వాల్సిరావడమే తలనొప్పి. ఒక్కోసారి మీ ఈ-మెయిల్ ఐడి
దుర్వినియోగం అయ్యే ప్రమాదమూ లేకపోలేదు. ఒకవేళ ఈ-మెయిల్ ఐడి లేనివారయితే
తప్పనిసరిగా ఏదో ఒక ఈ-మెయిల్ సర్వీస్ ప్రొవైడర్ ను ఆశ్రయించి అప్పటికప్పుడు
ఈ-మెయిల్ ఐడి క్రియేట్ చేసుకోవలసి వస్తుంది. అయితే నెటిజన్లను ఈ ఆపద నుంచి
గట్టెక్కించడానికి ఇంటర్నెట్ లో కొన్ని డిస్పోజబుల్ ఈ-మెయిల్ సర్వీసులు
కూడా లభిస్తాయి. వీటిలో చెప్పుకోదగ్గది గొ రిల్లా మెయిల్ (Guerrilla Mail
). ఒక్క ఇంగ్లీషులోనే కాక డచ్, జర్మన్, ఇటాలియన్, నార్వేజియన్, పోలిష్,
స్పానిష్ వంటి భాషల్లో సైతం ఈ తాత్కాలిక ఈ-మెయిల్ సౌకర్యం లభిస్తుంది.
క్రియేట్ చేసుకున్న తర్వాత కేవలం గంట సేపు మాత్రమే ఈ ఈ-మెయిల్ ఐడి ఉంటుంది.
ఆ తర్వాత దానంతట అదే మాయమైపోతుంది. అందుకే దీనిని డిస్పోజబుల్ ఈ-మెయిల్
అని, యూజ్ అండ్ త్రో ఈ-మెయిల్ అని పిలుస్తారు. ఆ గంట సేపూ యాహూ, రెడిఫ్,
జీమెయిల్ వంటి రెగ్యులర్ ఈ-మెయిల్ సర్వీస్ ల మాదిరిగానే ఈ 'గొరిల్లా మెయిల్
కూడా పనిచేస్తుంది. ఇందులో ఈ-మెయిల్ ఐడి క్రియేట్ చేసుకున్న తరువాత మీరు
ఎవరికైనా మెయిల్ పంపుకోవచ్చు. ఒకవేళ అవతలి వాళ్ళు కూడా మీకు తిరిగి వాళ్ళ
ఈ-మెయిల్ ఐడి నుంచి రిప్లై మెయిల్ ఇస్తే దాన్ని మీరు చదువుకోవచ్చు కూడా.
కాకపొతే ఇదంతా సరిగ్గా 60 నిమిషాలు.. అంటే గంటలోనే పూర్తి కావాలి. ఆ తర్వాత
మీరు ఎంత వెతికినా మీ ఈ-మెయిల్ ఐడి మీకే కాదు, ఎవరికీ కనబడదు.
బాగుంది
కదూ? ఈసారి ఎప్పుడైనా ఆన్ లైన్ లో ఎవరికైనా మీ శాశ్వత ఈ-మెయిల్ ఐడి
ఇవ్వాల్సిన పరిస్థితే వస్తే, అది ఇవ్వడం మీకు ఇష్టం లేకపోతే.. మీరు
నిరభ్యంతరంగా ఈ 'గొరిల్లా మెయిల్' సర్వీసును ఉపయోగించుకోవచ్చు. ఇవి కూడా ట్రై చేయవచ్చు..
ఇంటర్నెట్
లో తాత్కాలికంగా ఈ-మెయిల్ సర్వీసులు అందిస్తున్నది ఒక్క 'గొరిల్లా మెయిల్'
మాత్రమే కాదు. ఇంకా ఇలాంటి డిస్పోజబుల్ ఈ-మెయిల్ సర్వీసులు చాలా ఉన్నాయి.
వాటిలో చెప్పుకోదగినవి.. 10 మినిట్ మెయిల్.కాం, మెయిలినేటర్.కాం, యోప్
మెయిల్.కాం, మింట్ ఈమెయిల్.కాం, మెయిల్ డ్రాప్.సిసి, జేటేబుల్.ఆర్గ్ వంటివి
కూడా గొరిల్లా మెయిల్ మాదిరిగానే టెంపరరీగా ఈ-మెయిల్ సర్వీస్ అందిస్తాయి.
వీటిలో
10 మినిట్ మెయిల్.కాం అందించే మెయిల్ సర్వీసు కేవలం పదంటే పది నిమిషాలు
మాత్రమే పనిచేస్తుంది. ఒకవేళ మీరు కావాలనుకుంటే ఒక ట్యాబ్ పై క్లిక్ చేయడం
ద్వారా గడువును మరో పది నిమిషాలు పెంచుకోవచ్చు. ఇలా ఎన్నిసార్లయినా గడువును
పెంచుకోవచ్చుగానీ, ఆ పది నిమిషాల గడువు తీరక మునుపే గడువును పెంచుకుంటూ
ఉండాలి.
ఇక మెయిలినేటర్.కాం విషయానికొస్తే.. ఇది కూడా గొరిల్లా
మెయిల్ మాదిరిగానే ఒక గంట సేపు మాత్రమే పనిచేస్తుందికానీ ఇందులో ఒక సౌలభ్యం
ఉంది. అదేమిటంటే.. ఒక్కసారి మీరు ఈ-మెయిల్ ఐడి క్రియేట్ చేసుకుంటే ఇక
దానిని తర్వాతెప్పుడైనా ఉపయోగించుకోవచ్చు. అయితే ప్రతిసారీ అదే ఈ-మెయిల్
ఐడిని ఉపయోగించి వెబ్ సైట్ లోకి సైన్ ఇన్ అవ్వాల్సి ఉంటుంది. అంటే సైన్ ఇన్
అయిన ప్రతిసారీ ఓ గంటలోగా మీ మెయిల్ ఐడి ద్వారా మెయిల్ సర్వీస్ పొందవచ్చు.
కానీ ఇందులో ఉన్నఒక అసౌకర్యం ఏమిటంటే.. భద్రత లేకపోవడం. అంటే.. మీ
ఈ-మెయిల్ ఐడి తెలిసిన ఎవరైనా అదే ఐడిని ఉపయోగించి ఎవరికైనా ఈ-మెయిల్
పంపవచ్చు. ఇది మీకు ఏమాత్రం శ్రేయస్కరం కాదు.
మింట్ మెయిల్.కాం
కూడా 10 మినిట్ మెయిల్.కాం మాదిరిగానే 10 నిమిషాలపాటే పనిచేస్తుంది. అయితే
10 నిమిషాల గడువు ఆటోమాటిక్ గా పొడిగింపబడటం ఇందులో ఉన్న ప్రత్యేకత. అంటే..
మీ మెయిల్ ఇన్ బాక్స్ లోనికి ఏదైనా మెయిల్ వచ్చినప్పుడల్లా మీ ఐడి గడువు
పొడిగింపబడుతూ ఉంటుందన్నమాట.
ఇక జెటేబుల్.ఆర్గ్ విషయానికొస్తే.. ఇతర
అన్ని తాత్కాలిక ఈ-మెయిల్ సర్వీసుల కంటే కూడా అధునాతన, యాంటీ స్పామ్
టెక్నాలజీ కలిగినటువంటి సర్వీస్ ఇది. కొన్ని వెబ్ సైట్లు ఈ టెంపరరీ
డిస్పోజబుల్ ఈ-మెయిల్ ఐడిలను స్పామ్ కింద పరిగణిస్తాయి. అలాంటి సమయంలో ఈ
జెటేబుల్ మెయిల్ ఐడి అక్కరకొస్తుంది. ఇది మొదట మీ ఒరిజినల్ శాశ్వత ఈ-మెయిల్
ఐడిని గుర్తుంచుకుంటుంది. ఆ తర్వాత మీరు క్రియేట్ చేసుకున్న జెటేబుల్
మెయిల్ ఐడికి వచ్చే ఇన్ కమింగ్ మెయిల్స్ అన్నిటినీ మీ ఒరిజినల్ శాశ్వత
ఈ-మెయిల్ ఐడికి చేరవేస్తూ ఉంటుంది. మీరు పెట్టుకున్న గడువు తీరిపోగానే మీ
జెటేబుల్ మెయిల్ ఐడి ఎవరికీ కనిపించదు.
మొత్తానికి ఈ డిస్పోజబుల్ ఈ-మెయిల్ ఐడిల కథా కమామిషు బాగుంది కదూ?!
